2009年1月28日星期三

開年飯 (四):海帶味噌湯

        上年開年為求快手,我都會效法媽咪開罐粟米蓉滾湯,今次就搞搞新意思,煮番個日式味噌湯,一樣又快手又好味。


材料:
海帶
蟹柳
盒裝豆腐
米味噌
木魚味噌
冬菇蒂


調味料:


        海帶先洗去表面啲鹽,之後浸水至發大兩倍以上,再洗乾淨,然後切粗條;蟹柳拆去獨立包裝袋後切細段;豆腐切粒;冬菇蒂係初一用冬菇煮齋時預先剪下,唔好浪費咗佢,佢係一樣要嚟熬上湯嘅好材料;味噌預先用凍水開咗,確保完全溶哂


        煲滾水後,先放海帶同冬菇蒂落去煲一陣間,之後可以落埋蟹柳同豆腐,最後加埋開勻嘅味噌,加糖調味,煲番滾就可以熄火。落糖前記得先試味,因為唔同種類嘅味噌會有唔同程度嘅鹹味。我睇過書教煮味噌湯,一定要最後先至落,而且唔可以煲太耐,否則會影響味噌原本味道,風味大減。


        因為阿馳不嬲晏晝都唔鍾意食飯,所以我特別煮啲烏冬同日式拉麵,放埋落味噌湯度食,風味絕佳!


       


2009年1月27日星期二

開年飯 (三):柚子芥茉麥片雞翼

        上次食過南乳麥片雞翼後,到依家仲好回味,加上又想試吓 "新屎坑" 嘅薄脆烘烤功能,所以決定整呢個餸,再者,放咗入爐後就唔駛理佢,等佢喺裡面自動焗熟,慳水慳力,一舉兩得!



材料:
雞翼
雞蛋
麵粉
即食麥片


調味料:
檸檬皮茸
七味粉
混合香草


醃料:
柚子蜜
英式芥茉


        雞翼洗淨後,用抹手紙索乾水份,然後用醃料醃好,最好醃過夜,咁就更加入味;雞蛋拂成蛋液備用;麥片同所有調味料撈勻。將雞翼兩面先撲上麵粉,之後蘸蛋液,最後放入麥片中,黏滿麥片就 OK 喇。烤盤先鋪上錫紙,排好雞翼後就放入焗爐內,選擇薄脆烘烤功能,用200度焗約 15分鐘就攪掂。


        分次用焗爐焗比上次用烤爐焗更加原汁原味,因為用烤爐焗時,到熟之後會出汁出油;但今次就唔會咁樣,所以焗熟咗都唔知,我覺得有少少熟過頭,我老豆都話一啲都唔覺得油膩,仲脆過上次,可能呢個就係熱風烤焗加石英管烘脆嘅好處啦!


開年飯 (二):日式京蔥燒汁帶子

        呢個餸聽個名就好似好複習,但係其實係非常之易煮。


材料:
京蔥
急凍帶子


調味料:
日式燒肉汁



        呢支就係日式燒肉汁喇。
 


        帶子解凍後沖一沖水,然後用粟粉逐隻 "捽幾捽",過水洗淨後就放入滾水中,立即熄火,冚蓋焗 30 秒鐘,即刻撈番起佢,攤凍備用;京蔥洗淨後切粗片。燒熱平底鑊,放京蔥落鑊炒香,炒到五成熟就加入燒汁,煮一煮就放埋帶子落去,因為燒汁都幾濃味,所以落番少少糖調味,唔駛太鹹,兜幾兜就好熄火上碟喇,如果唔係啲帶子就會超縮水同變得過實,唔好食 o架喇!


        點呀,係咪好易煮呢!阿馳就話最欣賞呢碟喎。


開年飯 (一):梅菜炆豬肉

        今日係大年初二,阿馳必定會同女朋友一齊返嚟食開年飯,因為食完飯之後佢哋要趕出去同伯伯拜年同睇煙花,所以我就煮咗幾個簡單快手餸。首先就第一時間整定個需時較長餸,就係梅菜炆豬肉,炆落咗之後先至準備其他餸,咁就可以慳番啲時間喇!



材料:
枚頭半肥瘦豬肉
梅菜
蒜茸


調味料:
生抽
老抽
紹酒


        細個果陣時,如果我同阿馳唔聽話,媽咪就會話:「係咪要同你哋 "開年" 呀!」意思即係要 "滕條炆豬肉",今年媽咪雖然唔喺,無咗 "滕條炆豬肉",但係我就自己炮製咗呢個梅菜炆豬肉。


        原本應該係用五花腩嘅,但係去到超市肉枱時,拎起咗盒五花腩幾次,最終都係放番低,因為真係過唔到自己個過,眼見肥膏佔三份二,瘦肉佔三份一,心諗:點食得落呀!見放隔離有隻叫做枚頭半肥瘦豬肉,肥膏只佔約四份一至五份一,於是就問吓肉枱個阿姐:「啲枚頭半肥瘦豬肉可唔可以用嚟炆 o架?」阿姐話:「可以,用嚟炆冬菇都得 o架!」聽完之後即刻放下心頭大石,於是快快手揀咗兩盒就去買其他嘢。


        豬肉買咗返嚟之後,洗乾淨就要汆水,去除過多油脂,之後沖凍水、切件備用;梅菜先用水浸半個鐘,出啲鹹味,之後就洗乾淨、切粗粒。燒熱油鑊,爆香蒜茸後,落豬肉炒幾炒,之後贊酒,炒多兩炒就加水,加調味料,中火煮至水滾後就落埋梅菜,然後用最細火慢慢炆,炆到豬肉腍就 OK,如果見汁多的話,可以將火較番大,煮一煮乾啲汁,咁就完成喇。


        我同佢哋講,好好慢慢品嚐呀,今次係我破天荒煮肥豬肉你哋食,再無下次 o架喇,而且又好麻煩,用眉毛鉗將啲豬毛逐條慢慢抆出嚟,好似萬寧個廣告咁,個阿媽樁低身慢慢剁魚肉同抆魚骨,所以要好好珍惜!佢哋三個都話好好食,但係就諗都無諗過,居然係位女仕食得最多! 因為佢話佢特別鍾意食梅菜喎!不過就鹹啲,但就好送得飯,所以成煲都食得哂,淨係剩番少少梅菜咋!


2009年1月26日星期一

南乳齋

        每年大年初一,媽咪必定會煮南乳齋,皈依咗之後就更加會煮齋上供啦,所以我都秉承傳統,繼續代媽咪初一煮齋供佛。       



材料:
紹菜
雲耳
雪耳
金針
冬菇
粉絲
甘荀
鮮腐皮
薑片


調味料:
南乳


        雲耳、雪耳、金針浸水,剪去硬蒂,洗乾淨後汆水備用;冬菇同粉絲用水浸軟後,去蒂、洗淨;甘荀刨皮,洗淨後切厚片備用;鮮腐竹沖水後撕成適當大細。


        燒熱油鑊,先放薑片、南乳落鑊爆香,跟住加入紹菜、甘荀、金針、雲耳同雪耳兜勻,加小量水冚蓋煮腍,當紹菜煮腍後,就加埋其餘材料落去一齊煮,落鹽、糖調味,汁乾後就可以上碟。


2009年1月25日星期日

變頻式微波爐

        好開心呀,新微波爐卒之趕及新年前送到啦!



       吓佢個外型幾靚!不過就大舊啲,佔好多位啊!


 



        內壟都好大,最好就係唔再需要個轉盤,慳咗好多位,可以放隻大嘅碟入去。


 



        哎喲,穿崩,連我對玉手同部相機都上埋鏡o添!


        呢個微波爐有好多功能 o架,除咗本身微波功能外,仲可以用蒸氣、烘焗、燒烤、發酵同整果醬等等,亦可以混合配搭各個功能,真係好方便,係出邊電器舖賣 $3,500 - $3,900,但係我依家只需 $2,270 咋,因為用 credit card 啲積分加錢換嘅,所以慳咗好多。如果唔係因為上年用哂啲年資折扣 quota,我仲可以只需一半積分 o添咋!不過唔緊要啦,反正我啲積分都多到嘥。


        呢個禮拜比較得閒,可以試吓用嚟焗蛋糕囉!


2009年1月21日星期三

綠豆南瓜香芹湯


材料:
綠豆
南瓜
芹菜 (唐芹)
蜜棗
薑片


        綠豆洗乾淨,用水浸過夜;南瓜去皮去瓤、切件;芹菜洗淨後連葉切段。煲滾水後,先放薑片同綠豆煲一陣,之後放埋南瓜件落去,再煲多陣就可以落埋芹菜,滾多幾滾,加鹽調味就可以飲得啦!


P.S.  如果啲南瓜煲得太腍,可以喺飲之前半個鐘先加入;芹菜同樣唔好咁早落,因為煲太耐香味會減低。另外,唔一定要加薑片,因為今次無落到肉去煲,我怕會寒涼,所以先至加幾片薑落去煲。


2009年1月20日星期二

蒸細鱗


材料:
細鱗
薑片
蔥段
蒸魚豉油


        其實蒸魚就無乜太大特別,加上我係佛教徒,唔會食生猛海鮮,只會食 "o訓覺" 魚,所以無乜值得講,不過就想同大家分享吓我今日嘅經驗。


        呢次係我第一次自己買細鱗蒸嚟食,以前媽咪都間唔中會買呢隻魚嚟蒸,都覺得好食,但其實今日我喺魚檔見到時,係鋪哂喺冰上面,好大部份都已經有 "白內障",唯獨是我揀到呢條仲係眼仔碌碌,對眼好晶瑩通透,魚腮就一定唔係鮮紅 o架喇,但就不之於瘀紅,只係淡紅啫,見佢 size 都唔細,夠我哋兩個人食,全部都只係 $13 條,加上之前多數食急凍魚柳或魚扒,好耐都未食過蒸魚喇,所以即管買嚟試試,不過唔會抱太大期望。


        點知蒸完出嚟又幾好喎,我老豆因為 "無牙",所以不嬲都淨食魚腩,佢就話無乜味,個係我食個魚背就非常鮮甜,夾咗少少俾佢試,佢都話同個腩完全唔同,鮮甜好多,由此可以證明到兩樣嘢:


1. 魚不可以貌相


2. 魚腩同魚背嘅食法係可以有咁大分別


美亞開倉


        星期日喺將軍澳教完琴之後,搭巴士去牛頭角轉車返屯門時,見到美亞張開倉減價 poster,見反正之後都無嘢做,就 "貢" 上去八吓,睇吓會唔會有電子磅買。電子磅就冇得賣啦,煲就大把,不過我就唔會買啦,學媽咪話齋,美亞啲煲個個都識 "噴水" 嘅,當水或食物煲滾時,啲水蒸氣實會喺煲身同煲蓋之間嘅罅隙積聚,到積無可積時就噴哂出嚟,攪到個爐頭濕哂,好鬼煩,所以對佢出品嘅煲同鑊就唔係咁欣賞。我反而掃咗幾件廚具。



        呢 3樣就通通 $10件,抵玩啦!個蒸架係由我媽咪之前開始搵,搵到依家先至搵到一個咁大 size,一般舖頭都冇咁大個賣 o架,除咗可以用嘢之外,遲啲仲可以用嚟做焗蛋糕嘅放涼架 o添!個大匙羹就買嚟方便舀沙律、通粉或多汁餸,蛋糕鏟就唔駛講都知用嚟做乜啦。


 



        個批皮器同餅模就賣 $15,壓薯蓉器就賣 $19,因為我好多時都會整焗薯蓉,因為連我老豆唔鍾意食西式嘢都話好食,又簡單,加上上次 Louisa咗我整個好好食嘅薯蓉沙律,到夏天我一定會成日整嚟食,以後就唔駛再用隻叉慢慢壓爛,慳番啲力。之於個餅模就買定嚟整曲奇同 scone,希望個新微波爐快啲送到嚟啦!


 


合桃包

        星期六 Lily嚟學琴時又請我食麵包啦,無錯,又係我倆嘅 favourite 麵包店 "Pumpernickel 黑麥"。今次佢就帶咗個蜜糖杏仁檸檬包同合桃包俾我試。




        呢個係合桃包,個樣睇落去好似黑麥包,但係食落就完全唔同。啲合桃雖然切到好細粒,但係因為用料夠多,所以咬落去啖啖都有合桃,麵包鹹鹹香香,都幾好味,如果啲合桃大粒啲仲正!


        至於個蜜糖杏仁檸檬包就無影到相啦,因為教完 Lily 之後就落落街買餸,返到屋企已經好肚餓,所以見到個咁吸引嘅麵包就食都食唔切,食食吓先記得無影到相 o添!所以相片欠奉啦。不過個包就比較普通,無乜 "個性",合桃包好食好多。


2009年1月14日星期三

沙參玉竹雪梨煲豬腱

        近排天氣真係好乾燥,不但嘴唇乾,成身皮膚都好乾,雙手就更加唔駛講啦,爆拆到阿媽都唔認得,所以今日就特別煲呢個湯嚟滋潤番吓先!



材料:
沙參
玉竹
麥冬
南北杏
無花果乾
蜜棗
雪梨
豬腱


        好簡單,將所有藥材預先浸水,之後洗乾淨備用;無花果乾開邊,等佢易啲出味;雪梨批皮、去芯去蒂,之後切開成四件;豬腱洗淨、汆水,然後沖凍水去除血水。準備好哂就全部一次過放哂落滾水度,煲好後加鹽調味就飲得啦!


        今次係我第一次用無花果乾煲湯,因為賣果個人話除咗可以就咁食,用佢嚟煲湯仲清甜過平時用開果種無花果,所以咪試囉。但係呢度除咗佢,雪梨、豬腱同蜜棗都會令啲湯甜,所以我都唔知佢嘅 "貢獻" 有幾大,就咁當口果食就真係好甜嘅!


2009年1月13日星期二

團年飯 (四):阿參海鮮粉絲


材料:
急凍白魚柳
急凍魷魚
急凍蝦仁
蕃薯粉絲
翠玉瓜
蔥花
芹菜


醃料:

胡椒粉
黑椒


調味料:
魚露
阿參醬


        魚柳洗淨瀝乾水,用抹手紙索乾水份後,用醃料醃好;魷魚同蝦仁先用水沖洗,再用粟粉 "省" 吓,可以去除表面啲潺,之後過水沖走粟粉。魷魚切圈、蝦仁切開背面,用鹽同胡椒粉醃好;蕃薯粉絲用暖水浸軟,洗淨備用;翠玉瓜洗淨切片;芹菜洗淨切粒。


        準備好哂所有材料後,先將魷魚同蝦仁預先灼熟,但只需放滾水內約半分鐘,因為陣間要回鑊再炒,所以唔駛灼到全熟,如果唔係就會熟過頭。之後燒熱油鑊,將魚柳撲粉,放鑊內煎至微黃就 OK,盛起備用;跟住略炒翠玉瓜,之後加少少水,倒入阿參醬煮開後,放入粉絲煮一陣,再將所有海鮮料回鑊,最後加入魚露、糖、蔥花同芹菜粒,炒兩炒就可以上碟。


        煮呢個餸時一定要試味,因為阿參醬係好濃味,又酸、又辣,又鹹,所以糖可以用多少少,魚露就唔駛太多,純粹代替鹽用嚟調味,同埋更多有東南亞風味。


團年飯 (三):菠蘿沙爹豬頸肉

        噚晚因為攪到太夜啦,只係夠時間寫到兩個餸,今日繼續寫埋剩低兩個。



材料:
豬頸肉
彩椒
罐頭菠蘿粒


醃料:

魚露
老抽
孜然粉
混合香草
粟粉


調味料:
沙爹醬

菠蘿汁


        豬頸肉洗淨後用抹手紙索乾水份,之後切片 ( 可請肉枱職員代勞,因為用家用廚刀係好難將豬頸肉切開 ),用醃料醃好,最後醃過夜,咁就更入味;彩椒洗淨後切件;菠蘿粒隔汁,菠蘿汁留用。


        燒熱油鑊,先炒豬頸肉至八成熟,盛起,再炒彩椒,加少少水煮至略軟身,之後就加埋菠蘿,煮番熱,再加入調味料,炒兩炒,豬頸肉回鑊炒多陣就攪掂。


        如果覺得汁太多的話,可用菠蘿汁開粟粉埋芡。呢個餸好惹味,酸酸甜甜,好送得飯 o架!豬頸肉又香又爽,超正!


團年飯 (二):冬菇蠔豉海參炆雞

        由細到大,呢個餸係每次做節食飯都會煮,我諗係因為除咗有 "藉口" 食好,會煮海參、蠔豉之外,就係媽咪覺得意頭好卦,有 "生財" ( 生菜 )、"金錢" ( 冬菇 )、"好市" ( 蠔豉 )、"橫財" ( 豬橫脷 ),所以我都秉承呢個傳統,每逢團年或初二開年,我都必定會煮番呢個餸。最衰依家好難買到真發菜 ( 其實都唔係難嘅,捨得俾錢咪有囉!),如果唔係,我就會跟足媽咪一樣落埋發菜,咁就會多樣 "發財 " 喇!



材料:
冬菇
蠔豉
海參
黃耳

豬橫脷
唐生菜
蒜茸


醃料:


生抽
胡椒粉
紹酒
粟粉
麻油


調味料:


老抽
蠔油
紹酒

麻油


        呢碟係醃好嘅雞、發好嘅海參同洗淨豬橫脷。


 



        呢碟係洗淨嘅冬菇、蠔豉同汆咗水嘅黃耳。


 


        雞洗乾淨、瀝乾水,用抹手紙索乾水份後,用醃料醃好備用;冬菇浸透,去蒂、洗淨 ( 今次試吓學阿蘇用粟粉洗,睇吓會唔會 "令" 身);蠔豉用熱水浸軟後洗淨備用,海參係媽咪知道自己就快要離開我哋時,親自督師教路點樣發海參,等我之後可以自己隨時煮食,所以發定好多放喺冰箱,我只需係冰箱攞番出嚟解凍,洗淨後用薑蔥汆水,之後切件;黃耳用水浸透發大後,剪去底部硬木,洗淨汆水備用;雞洗乾淨後,用醃料醃一個鐘;豬橫脷切去底部中間白色組織,洗淨備用;唐生菜洗淨備用。


        燒熱真空煲內鍋,落油、爆香蒜茸,跟住落雞兜炒幾吓後就贊酒,之後加埋蠔豉、海參同豬橫脷,兜多兩兜,再放埋剩低嘅材料落去,加水及調味,煮到啲汁大滾後,轉細火炆一陣,之後再用番大火滾起就放落真空煲度,食飯前拎番出嚟煲多一陣,跟住灼埋啲唐生菜墊低,將啲舀喺面,咁就攪掂喇!


        味道啱好,香噴噴,聞到味就好有做節 feel,生菜又索哂啲汁,好味!


團年飯 (一):靈芝雲芝姬松茸煲響螺頭

        今日我哋做節食團年飯,點解提早咁多?咪因為要就阿馳返早班,可以收早返嚟食飯,同埋我又要求星期一呢,因為逢星期一係我 day off,我先至有足夠時間去買嘢、準備、煮飯嘛,唔只要就我,又要就阿馳同佢女友,所以得番今日係個個都 OK,過多兩個禮拜已經年初一喇!


        雖然我唔係煮九大簋,但呢餐團年飯已經由噚日準備到今日,依家先至啱攪掂好哂,坐低落嚟寫 blog 咋!可能我煮餸用太多材料,又或者我手腳慢啦,加埋仲要做其他家務,噚日又天都未光就起身,準備去將軍澳教琴,好唔夠 o訓,所以攪到呢兩日好鬼死攰。天氣非常乾燥,又一味濕水做嘢,雙手都爆拆裂哂,好痛!不過唔緊要啦,一年都無得幾多次,只要一家人喺埋一齊食團年飯就已經好開心喇,當然,如果媽咪都喺度陪我哋就仲開心啦!我都有另外舀起餸同沖咗杯茶俾佢 o架,當係一齊團年 o架啦!



材料:
靈芝
雲芝
姬松茸
茶樹菇
紅蘿蔔
急凍響螺頭
豬腱
蜜棗


        靈芝、雲芝、姬松茸同茶樹菇先用暖水浸軟,剪去底部硬木部份,之後洗淨備用;紅蘿蔔刨平、洗淨,用滾刀切件;響螺頭先去除吸管及內藏,洗淨後汆水,盛起用凍水沖洗,之後切片;豬腱洗乾淨後汆水,盛起後同樣用凍水沖洗,清除血水雜質,蜜棗用熱水浸軟後洗淨備用。


        煲滾水後,將所有材料一次過倒落煲度煲,飲之前記住落鹽調味。


2009年1月10日星期六

香芹炒藕片


材料:
蓮藕
芹菜 (中芹)
辣椒


調味料:


生抽


        蓮藕刨皮、洗淨,切片備用;芹菜洗淨、切粗粒;辣椒洗淨、切粒。燒熱油鑊,先爆辣椒粒,隨後加入蓮藕片炒熟 ( 如果鍾意爽口就唔好炒太耐 ),之後加埋芹菜炒兩炒,加入調味即成。


        好簡單嘅一個素菜,但要掌握好火候,唔好炒得過熟,否則會太腍身唔夠爽口。值得一提嘅係蓮藕含豐富澱粉質,所以即使汁料水份過多都毋須打芡,因為煮耐嘅蓮藕澱粉會自動幫手埋芡。


        記得之前 Li Kien 去完大陸演出返嚟,佢買咗盒藕粉俾我做手信,用途同食法都跟馬蹄粉無異,同樣可以要嚟打芡或煮甜品糖水


2009年1月7日星期三

唐辛子七味粉 & Wasabi 海苔飯素

        噚日去 Louisa 屋企教琴真係又食又拎喇,夜晚餐飯已經喺佢度食,佢仲俾埋樽唐辛子七味粉同 Wasabi 海苔飯素我 o添。




        佢話上次去日本玩果陣,Arthur同Genevive喺餐廳食嘢果陣,加咗呢啲調味料覺得好好食,於是就買埋返屋企,點知買咗返嚟佢兩個又唔食,見又就快到期,所以就送咗俾我。雖然就快到期,不過都唔緊要,我平時都照用啲過期調味料 o架啦,都唔慌會食得死人。


        我不嬲都想買呢兩樣調味品,不過見唔係成日用,買咗返嚟又要搵地方擺,屋企真係已經放咗好多唔同調味品喺度,尤其係果啲 "開蓋後必須冷藏" 嘅醬料,多都霸哂雪櫃其中一格,好彩依兩樽嘢唔駛放雪櫃,又唔駛額外俾錢買,真係好!


雜果仁紅糙米黃耳木瓜湯


材料:
紅木瓜
腰果
合桃
栗子
紅米
糙米
黃耳
冬菇蒂
陳皮
蜜棗


        木瓜去皮、去核、去瓤,切件備用;紅米、糙米、腰果、合桃、冬菇蒂、蜜棗洗乾淨備用;栗子去殼、去衣 (方法可參考 );黃耳用水浸過夜,剪去底部嘅硬物,之後洗乾淨;陳皮去瓤,洗淨備用。水滾後,將所有材料一次過放落煲度煲,咁就攪掂。飲之前可以加鹽調味,不過唔加都得,因為木瓜夠甜,加埋栗子同蜜棗,即使無落肉煲都好好飲,好清甜,唔會覺得 "寡",直情當糖水食都得;而果仁、陳皮同冬菇蒂獨有嘅香味,令啖湯生色不少。


可能係世界上最好嘅搭掤公司

        因為樓下果家個露台外牆紙皮石剝落,所以管理公司搵咗人搭棚同佢做維修。當我一入廚房做嘢時,就見到個戴住 NY 鴨舌帽嘅後生靚仔喺度做緊,真係無諗過會係個後生仔,以為一定係中年 "佬"。我跟住就即刻諗起嘉士伯個廣告果句 slogan:「最衰嘉士伯無攪搭棚啦,如果唔係,嘉士伯可能係世界上最好嘅搭掤公司。」


    嘻嘻!


命運

        真係一得就必一失,命運已經為你安排好,為乜仲要強求呢!

        噚日搭 48X去馬鞍山教 Louisa 時,居然唔識得喺城門隧道前個轉車站轉 40X,仲 "懶醒" 咁提自己唔駛落車轉車呀,唔知係自己老人癡呆又發作呀,以為自己坐緊 43X直去馬鞍山,定係隔咗一個禮拜無去到就即刻唔記得有轉車呢會事呀,定係啱接完 Louisa 同 Gordon 個電話後已經到咗城隧轉車站,個心仲未 "平伏",思想未清晰呢!出咗隧道咗沙田後,見架車駛入新城市廣場底果個巴士站時都仲未 "醒水",仲諗住梗係前面有交通意外要改道,就係呢個時候,先至突然 "登" 一聲,醒起自己搭緊果架係 48X,要之前轉車,咁唯有即刻落車,再轉其他巴士或火車入番馬鞍山囉!


        原本喺城隧轉車站轉車只需補多 $0.9,依家就要俾 $5.2 搭巴士入去,洗多嘅錢啱好等於星期日去吉之島買嘢折嘅錢,你話我係咪真係好似之前篇 blog 咁講,打破唔到宿命哩!

        唔緊要啦,媽咪每次見到我有舊學生唔學琴,攪到唔開心果陣時,都會咁樣安慰我:「點解你要覺得每次有新學生學琴,總會有舊學生走,攪到收入根本無增加到,你應該掉番轉諗,個天已經對你好好 o架啦,知你將會有學生走,依家就俾定一個新生你補上。」將佢變成:「個天已經對你好好 o架啦,知你會唔記得轉車蝕錢,依家咪俾定你買嘢有折,補番條數囉!」


        諗到呢度,我個心就即行舒服咗,放低咗。如果以後再遇到任何唔開心嘅事都有媽咪安慰我、鼓勵我就好喇!


2009年1月6日星期二

西洋菜滾鯪魚肉


材料:
西洋菜
鯪魚肉


醃料:


生抽
雞粉
胡椒粉


        西洋菜洗乾淨,瀝乾水備用;鯪魚肉買返嚟之後,就跟媽咪一貫處理手法,自行再加啲調味料落去醃一醃,咁就會好味好多,尤其係用嚟滾湯,因為個湯嘅味道完全靠哂佢。落咗醃料攪勻之後,啲魚肉會變得鬆散,所以要用筷子夾起啲魚肉,再撻番落隻碗度,如是者撻多幾次,啲魚肉就會再次起膠,咁就可以黏番埋一齊,如果都係唔得,咁就要出絕招啦 — 落少少粟粉落去,咁就一定掂!


        煲滾水後,先放鯪魚肉落去滾一陣,等佢出吓味,之後再放埋西洋菜落去,等水煲番滾之後就可以熄火,盡量保持菜色嫩綠,咁樣食落口會爽脆啲 o架。


麻香辣炒粒粒

        今日繼續煮 fusion 菜,用中式菜甫同紹酒、日式芝麻醬、泰式嘅魚露同辣椒醬嚟炒粒粒實行嚟一次中泰日 crossover




        枝芥蘭莖係我老豆喺深圳間 Wal-Mart 度買 o架,我咁大個仔都未見過咁大碌芥蘭莖,咁棵芥蘭咪好巨型?。


材料:
白豆腐乾
芥蘭莖
花生
菜甫
蒜茸


調味料:

紹酒
魚露
泰國辣椒醬
日式芝麻醬


        菜甫預先用水浸一陣,減低鹹味,之後沖水洗淨,瀝乾備用;芥蘭莖先削去外皮,洗乾淨後,連同菜甫、豆腐乾一齊切粒;花生用熱水浸一陣,方便去衣,之後用白鑊炒香,盛起備用。先用蒜茸起鑊,爆香菜甫同豆腐乾,加入芥蘭莖一齊炒,贊酒後加入調味料及少少水,拌勻後冚上鑊蓋煮一陣,當芥蘭莖軟身後就倒埋炒香花生落去,兜幾兜就可以上碟。


        呢碟麻香辣炒粒粒好好食呀,味道好有層次,有麻醬嘅少少酸味同香味,有魚露嘅鹹味同特別風格,又有辣醬嘅辣味;食落口又有豐富 "口感" ( 俾阿蘇聽到實鬧死 ),有芥蘭莖嘅爽甜,豆腐乾嘅清香軟滑,仲有菜甫嘅爽脆,真係估佢唔到咁好食。


2009年1月5日星期一

繼續吉之島入貨

        吉之島咁快又做多次減價?好,繼上次俾明仔話我 "黑仔" ,買咗一轉貨補番數之後噚日我又再入貨,實行拉上補下,拉勻哂幾次嘅價錢,等自己個心好過啲,呵呵! 當然,我梗係有實際需要先至買啦,唔會因為要令自己個心好過啲而盲目咁去買嘢,咁就仲錢,right?



        唔知點解今次特別多人哩,塞到個場滿哂人,你撞我我撞你,好鬼死迫,好彩我心裡有數,預先 plan定要買嘢,一入到去就搵我要買嘢,買完就即刻離開現場,費事喺度慢慢迫


        其實呢次個主角係支麵粉棍,因為唔係間間 $10 店都有得買,所以上次減價都買唔到,呢次全部其實都係喺將軍澳店買嘅,但係就偏偏無呢支麵粉棍,所以都係返到入嚟屯門店先至買到咋!凍水壺就買嚟放凍飲喺雪櫃,因為之前用果個飲品樽樽口太細,唔可以徹底洗乾淨果樽裡面,所以之前裝完豆漿後發咗霉就掉咗 lu。膠盒就特登買嚟裝牛油嘅,而果個一套 3 件嘅小型食物盒就買嚟當模用,貪佢形狀特別,遲啲夏天整 mousse、pudding 同 jelly時,就用佢嚟做模。


2009年1月4日星期日

味噌排骨蒸南瓜

        用咗日本味噌去整一個典型廣東蒸餸,唔知算唔算係 fusion 菜呢?



材料:
肉排
腩排
南瓜


醃料:


生抽
米味噌
紅辣椒 ( 切碎 )
粟粉

麻油


        肉排及腩排洗淨、瀝乾,用醃料醃好,最後加粟粉、油同麻油撈勻,最好醃過夜,除咗可以入味啲之外,啲排骨醃過夜會腍啲 o架。南瓜去皮、去瓤,洗淨後切成方塊,排喺碟上,再喺南瓜上面鋪上醃好嘅排骨,就可以拎去蒸。


        我覺得呢碟嘅主角係南瓜而唔係排骨,因為南瓜本身已經好香甜,蒸好後再 "索" 埋排骨肉汁,特別惹味,加埋少少辣,寧捨開胃,自然食多幾碗飯啦!


2009年1月3日星期六

檸檬香蔥焗烏頭

 




材料:
烏頭
檸檬片
蔥段


醃料:
紹酒

胡椒粉
檸檬汁
檸檬皮茸
混合香草


        烏頭洗淨、瀝乾,用抹手紙索乾水份,然後用醃料內外醃好,將檸檬片同蔥段放於魚上、肚內及墊低,之後用錫紙紙包好,放入焗爐內用高火焗約15-20分鐘至熟,完成!


        打開錫紙後,即刻香氣撲鼻,魚肉又夠滑,好正啊!


清炒芥蘭

        今日經過菜檔,見到啲芥蘭好靚,吓都好耐無食過喇,所以就買返嚟清炒。




        呢扎芥蘭好嫩,細細條好 cute,一扎 $4 ,賣菜姐姐話大約有半斤,學佢話齋,啲菜如果靚,無乜 "下欄" 要摘就見食好多,我試過買 12 兩茼蒿返嚟,摘吓摘吓,得番都唔知有無半斤,灼熟埋就得番一 "住" 咁大把,都唔知夠邊個食!!


材料:
芥蘭
薑片


調味料:


紹酒


        媽咪教落,芥蘭一定要用米水浸洗,先至可以洗去表面果層白濛濛嘢。燒熱油,用薑片起鑊,放入芥蘭炒幾炒,然後喺鑊邊贊酒,加入鹽糖,再加少少水,冚蓋煮至腍身就 OK。


        炒芥蘭一定要落多少少糖,因為芥蘭有少少苦澀味,落糖可以中和番;同埋一定要落酒炒,咁樣炒出嚟碟菜會香好多。


鳳梨酥 & 香柚蜂蜜蛋糕

        早前 Louisa 去台灣出差,買咗好多蛋糕返嚟,主要都係蜂蜜蛋糕類,佢就送咗盒鳳梨酥同香柚蜂蜜蛋糕俾我做手信。




        香柚蜂蜜蛋糕喺佢屋企已經先食為快,不過同平時食到嘅蜂蜜蛋糕唔係好同,食落好粗嚡,唔似一般果啲好鬆、好軟、好滑嘅感覺,於是我就好奇問 Louisa 盒蛋糕係咪開咗好耐,但係佢話係果日朝頭早先至開,跟住我就睇啲成份,原來落咗麥芽,可能攪到個蛋糕咁嘅 "真兇" 就係佢啦!       





        呢盒就係鳳梨酥,個包裝好靚,同個封盒包裝紙完全唔同 style,高級好多。我俾咗兩舊 Lily,自己都未食呀,不過都唔慌難食得去邊啦!Louisa 買得都唔差,況且我又好鍾意食鳳梨酥,所以應該唔會失望嘅,如果真係好唔掂我就後補 comment 啦。我曾經都諗過自己整鳳梨酥 o架,不過因為無焗爐,所以都係得個諗字,希望個多功能微波爐快啲送到啦!


和風栗子卷

        今次卒之有機會試吓個和風栗子卷啦。



        哋話個外形似唔似一隻剪哂腳嘅巨型瀨尿蝦啊!


 



        睇唔睇到麵包果面都有好多栗子茸呀!


 



        除賣相吸引外,用料都唔輕手,唔單只喺個面度都落咗好多栗子茸,就連麵包裡面都有好多栗子茸,可以做成雲石紋。不過因為佢係軟包質,所以唔係咁討好,啲栗子茸就好香甜,好味程度足以令我忘記較為遜色嘅包質。


2009年1月2日星期五

朱古力疏乎厘咖啡 & 合桃楓糖包

        早排報紙度剪咗張 McCafe coupon,可以用 $12 買原本 $19 嘅朱古力疏乎厘咖啡,咁啱今日去九龍灣教琴,喺德福廣場裡面有間 McCafe,所以就入去買杯吓。淨係飲嘢當然唔夠飽啦,所以就去 Panash 買麵包,我揀咗個我嘅至愛 — 薯仔脆法包,仲買多個未食過嘅合桃楓糖包吓,因為個款都幾吸引。




        朱古力疏乎厘咖啡outlook 好靚呀,面頭果 "浸" 疏乎厘整得好平滑,我飲緊杯咖啡時,離遠望到個 staff 拎住壺打起cream / 奶,用茶匙一羹一羹咁慢慢舀喺杯咖啡個面度,唔知係咪整緊同一款咖啡呢?係嘅話就真係好花功夫哦!


        飲咗第一啖之後,我再一次明白,點解上次我叫杯 Vienna 時,個 staff 好 "語重心長,不嫌其煩" 咁同我講咗幾次 "下面係齋啡嚟 o架",因為呢次杯咖啡同上次杯 Mochaccino 一樣,一早喺杯咖啡度落哂糖,所以好甜,我寧願好似杯 Vienna 咁用齋啡,攪拌時撈埋上面打起cream,甜度就啱好,如果唔夠甜咪自己再落糖囉!


 



        合桃楓糖包啲色焗得好靚,加埋有我鍾意嘅合桃,簡真係無法抗拒,最衰已經凍咗啦 ( 其實佢棟住個牌寫住新鮮出爐 o架 ),如果唔係應該仲正,喺屋企我實焗番熱先食。今次係我第一次食用楓糖整嘢,食落有種好特別嘅糖香,而且又唔會太甜,幾好噃!


        好多時都聽到人講:「求其飲杯嘢,食過包就攪掂一餐啦!」俾到人感覺食麵包係好簡單求其,而且所費無幾,但我離開MacCafe 之後,一路行,一路諗,埋單計數,今餐晏仔 (其實係 tea-lunch) 都成 $30,如果無 coupon 仲唔只 o添呀!所以 "飲杯嘢,食過包" 都可以好奢侈 o架!