2009年10月7日星期三

豆渣處理及保存方法

        每次整完豆漿,我都會將啲豆渣留番起。雖然喺好多人眼中都會將豆渣視為癈物、垃圾,最好嘅處理方法就係倒哂落垃圾桶,乾手淨腳!

        但係豆渣其實係好有用 o架,可以用嚟整麵包、餅乾、蛋糕、煮湯 ……,甚至可以加番落啲豆漿度一齊飲用,若果再加啲燕麥片一齊煮,就成為咗一份營養豐富嘅早餐 o添!

        大型超級市場其實都會有豆渣賣,不過價錢肯定唔平,與其用錢去買呢啲 "垃圾",倒不如自己花少少功夫,不但經濟實惠,仲唔會浪費食物呢!

 




        不過,啱整完豆漿嘅豆渣,需要做啲處理工作先可以食用同保存:

- 將豆渣內嘅水份盡量搾乾,我自己就用攪拌機附設嘅壓搾桿將水份逼出。

- 之後將豆渣放落易潔鑊內,用白鑊將佢炒熟,炒至乾身。

- 亦可將豆渣放入微波爐內 "叮",其間需翻鬆幾次。




- 當豆渣炒乾或 "叮" 熟後,盛起攤凍,之後用膠盒裝好,放入雪櫃,可保存最少
 一個月。


Notes
- 若將豆渣放鑊炒的話,記得要不斷兜炒,以免黐底。
 

- 當豆渣變得鬆散同唔黐鑊鏟或攪拌器具,即代表已經煮好。

- 第二張相係整完黑豆漿之後剩低嘅豆渣,所以相中嘅係黑豆渣,唔好以為我將
  豆渣
燶哂呀!

2 則留言:

  1. 原來豆渣係咁,即係豆漿既餘物呢!
    [版主回覆10/12/2009 01:20:00]        係呀,其實係 "下欄 嘢",一 啲都唔值錢!

    回覆刪除
  2. 神奇女俠Natalie2010年8月1日 上午2:28

    我見到黑色‥以為加左黑芝麻‥
    [版主回覆08/01/2010 23:18:00]        咁妳又無錯喎,妳睇番 黑豆漿 篇 blog,我真係有落度黑芝麻 o架!

    回覆刪除