2010年6月28日星期一

粒粒番茄薯仔

        我好鍾意食呢味粒粒番茄薯仔o架,以前媽咪整嚫我都好捧場,食剩就一定由我包底,因為實在太好食喇!


        整呢個餸唔太難,睇過媽咪一次點整都已經識得做,而且好容易 o添!煩就煩在要炸薯仔囉!真係勁怕炸嘢,炸一次嘢,不單只要處理鑊油,仲要抹爐頭、抹廚房、抹地,皆因啲油會彈到周圍都係呀!好彩我可以用個焗爐嚟炸嘢咋,如果唔係,我寧願唔食好過!!



材料:
番茄
薯仔
香草


調味料:


茄汁
鮮醬油


- 薯仔刨皮、切粒,之後炸至金黃色。


- 番茄去蒂後洗乾淨,切粒備用。


- 燒熱油,爆香香草,之後放番茄粒入鑊兜炒一陣。


- 加入薯仔粒,落調味料,兜炒均勻。


- 最後再灑上少少香草兜勻即成。




粒粒番茄薯仔加粟米麵包,就係我今晚嘅晚餐喇,好 "鬼佬" 呀!



Notes:
- 香草可選擇自己鍾意嘅一種或多種,甚至唔用都可以。


- 番茄唔好炒得太腍,保持原粒會比較好食。


- 唔想開油鑊炸薯仔粒的話,可以將薯仔粒先撈適量油,然後放上已鋪錫紙嘅烤盤
  上,放入已預熱至 220 °C 嘅焗爐內焗至金黃即可,如果有烤焗功能 ( grill ) 的話,
  效果就更理想。



我個焗爐有個 "健康油炸食品" 內置菜單功能,一按制就自動炸食物,
仲定時放出蒸氣,咁食物就唔會太乾喇!佢中途仲會顯示出 " turn
over
",提你將食物翻一翻,咁就炸得更加均勻上色啦!




        你哋亦都可以喺
Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans


粟米麵包 Corn Bread

        今日又整麵包喇!今次整個比較少見嘅粟米麵包,因為見到佢個顏色金金黃黃,好吸引,同埋我都幾鍾意粟米 o架,睇吓整出嘅麵包有冇粟米香甜味先!


麵包外皮有少少煙韌,包身軟熟,顏色又靚,very good

焗香草瑞士雞翼

        呢排天氣又試係咁濕,攪到個人好攰好懶,唔想整啲複雜麻煩餸,加上見好耐都無整過雞翼,就整番個簡簡單單嘅瑞士雞翼啦!


        不過,今次我唔係就咁將啲雞翼放落去瑞士汁度煮熟,而係用瑞士汁做醃料,之後再放入焗爐度焗香,試吓效果係點。



有香草香,又有酒香,聞到都已經流哂口水喇!


材料:
雞翼
百里香 ( Thyme )
迷迭香 ( Rosemary )


醃料:
瑞士汁
玫瑰露


- 雞翼解凍後洗乾淨,用抹手紙索乾水份。


- 瑞士汁加入少量玫瑰露拌勻。


- 雞翼放入醃料內醃好。





- 將雞翼放上已鋪錫紙嘅烤盤內,灑上香草,放入已預熱至 220 °C 嘅焗爐內,用烤
  焗功能 ( grill )
8 分鐘。


- 將雞翼反轉,同樣灑上香草,再焗多 5 分鐘,完成。



外皮有少少脆,內裡肉嫩兼 juicy,一流呀!



Notes:
- 唔想嘥時間醃的話,可照樣將雞翼放入瑞士汁內煮一陣,之後夾起再放入爐焗。


- 加玫瑰露一齊醃可令雞翼有種酒香。


- 可選用自己喜愛嘅香草。


- 入爐時間需視乎雞翼大少而定,以焗至熟及顏色金黃為準。



        你哋亦都可以喺 Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans


橙香燕麥香蕉曲奇 Orange & Banana Oat Cookie

        一向都話:「未食五月粽,寒衣不入櫳。」依家啲天氣真係變哂,五月粽已經食過,7 月都嚟緊喇,呢兩日居然可以涼番咁多,夜晚瞓覺不單只唔駛開風扇,仲涼到要冚被,真係人都癲!!


        今日原本要上堂學生,星期五果日已經上咗,所以今日變dayoff,見屋企有隻蕉已經勁熟,咁就趁天氣涼用嚟整曲奇餅啦!



材料:
固體菜油      50 克
黃糖              40 克
香蕉              1 隻
蛋黃              1 個
君度橙酒      1 茶匙
低筋麵粉      100 克
泡打粉          1/8 茶匙
梳打粉          1/8 茶匙
橙皮茸          1 個橙份量
即食燕麥      40 克
小麥胚芽      10 克


以上材料份量可做 2 吋 X 2 吋半曲奇約 16 塊。 


- 所有粉類混合好,過篩 3 次;固體菜油加黃糖混合,用膠刮拌成忌廉狀。


- 香蕉去皮,用叉壓成香蕉蓉,加入糖油混合物內。


- 加入蛋黃同橙酒後,將所有材料拌勻,再篩入粉類,拌勻成麵糊。


- 加入橙皮茸、燕麥同小麥胚芽,拌勻。





- 將麵糊舀上保鮮紙上,包好做形,放入冰格雪至硬身。


- 將雪硬嘅麵糰切片,放上已鋪入爐防黏紙嘅烤盤上。


- 放入已預熱至 190 °C 嘅焗爐內焗 10 - 15 分鐘至熟。


- 出爐後攤凍一陣就移到架上,放涼至硬身即可。



焗緊果陣已經聞到好香橙味同香蕉味,啱哂我呢隻橙精。



Notes:
- 固體菜油可用牛油代替。


- 用較熟香蕉整會比較好,一來焗出嚟會香啲,二來熟香蕉比較甜,可以用少
  糖。


- 燕麥同小麥胚芽嘅用量需視麵糊嘅濃稠度而有所增減。


- 由於曲奇餅剛焗好出爐時係仍然軟身,所以要等到變得略為硬身之後先可以移到
  放
涼架上。


        你哋亦都可以喺
Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans


2010年6月22日星期二

牛油果忌廉三文魚焗飯

        好耐好耐之前,果陣我仲係讀緊演藝學院,我記得有次同個同學去「Spaghetti House」度食嘢,叫咗個類似牛油果三文魚飯嘅物體 ( 印象已經好模糊喇 ),覺得好好食,本來諗住同媽咪一齊再去食多次,但係,最終佢都係無機會試到!


        印象中Spaghetti」個飯除咗有三文魚同牛油果之外,好似仲有帶子 o添 o架,不過我今次個實驗就唔咁 "豪" 喇,淨係用三文魚同牛油果算數,成功之後先再加帶子整多次啦!




材料:
白飯
三文魚肉
牛油果
急凍粟米粒
乾蔥頭
雞蛋
罐頭忌廉磨菇湯


醃料:

黑椒粉


調味料:


白酒
百里香 ( Thyme )
羅勒     ( Basil )
豆蔻粉 ( Ground Nutmeg )


- 三文魚肉洗乾淨後切粒,用醃料醃好;粟米粒解凍後沖水,煲滾水烚幾分鐘。


- 乾蔥頭去衣、略沖洗,之後切片;雞蛋加少許鹽,拂打成蛋液,備用。


- 牛油果開邊、去核,用匙羹將果肉舀出,一半切粒,另一半用叉壓爛成果蓉。


- 燒熱油,爆香乾蔥頭同香草,之後落埋三文魚、牛油果同粟米一齊兜炒,加少量
  鹽同糖調味,灒酒,盛起。


- 加適量油,倒入一半蛋液,兜炒幾吓之後就加入白飯,快手炒至飯粒鬆散。


- 倒埋剩餘嘅蛋液落鑊,炒勻後就將飯舀上入爐烤碗內,將魚肉、牛油果同粟米鋪
  喺飯面。


- 忌廉湯加適量水及酒煮開,加入牛油果蓉同糖,拌勻成牛油果忌廉汁。


- 加入豆蔻粉,煮滾後就將忌廉汁淋喺飯面,再灑上少少香草。


- 放入已預熱至 240 °C 嘅焗爐內焗約 10 分鐘至表面金黃即可。





Notes:
- 三文魚唔駛炒得太熟,最後放入爐焗時會再焗熟啲。


- 忌廉磨菇湯可用其他味道忌廉湯代替。


- 白飯最好煮得乾身啲,因為會比較容易炒至鬆散。



        你哋亦都可以喺
Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans 啦!


2010年6月21日星期一

芝麻雪芳蛋糕 Sesame Chiffon Cake

        今日繼續清蛋白!


        整雪芳蛋糕都係其中一個清蛋白嘅好方法,因為蛋白用量係多過蛋黃嘛,加上已經有好一段日子無整雪芳喇。咁整咩味道好呢?有咁多食譜,隻隻都想試,咁多心,點算好呢?咗一陣,發覺屋企好多芝麻product,炒好芝麻粒、芝麻粉、芝麻醬、芝麻油都有,好啦,唔駛咁傷腦筋喇,就整芝麻雪芳啦!



材料:
蛋白 110 克
蛋黃 40 克
糖 60 克
低筋麵粉 50 克
他他粉 1/4 茶匙
水 50 克
芝麻醬 30克
橄欖油 20 克
麻油 16 克
白芝麻 10 克
黑芝麻粉 10 克


以上材料份量可做直徑 17 厘米蛋糕一個或直徑 12 厘米蛋糕 2 個。


- 麵粉過篩 3 次;芝麻洗乾淨、瀝乾水,連同芝麻粉一齊放入已預熱至 150 °C
 
嘅焗爐內焗約 7 分鐘至香味出。


- 芝麻醬加水拌勻,之後加入橄欖油同麻油混合,加熱至 40 °C,備用。


- 蛋白加入他他粉,用電動打蛋器打至起泡,之後分 3 次加入 50 克糖打至企
  身。


- 蛋黃打散,加入剩餘 10 克糖,用電動打蛋器打到略為淡黃色,之後將芝麻醬、
  油混合物加入,拌勻。


- 篩入麵粉,拌勻成麵糊。


- 將蛋白霜分 3 次加入麵糊內,之後傾斜攪拌兜,用膠刮以切拌方式輕手拌勻。


- 最後均勻拌入芝麻粒及芝麻粉。


- 將麵糊倒入雪芳模內,輕敲枱面幾吓,之後放喺烤盤上,放入已預熱至 160 °C
 
嘅焗爐內焗約 25 鐘至熟透。


- 出爐後立即倒扣放涼,攤凍之後即可脫模。




其實焗緊嘅時候都已經不斷聞到好香芝麻味,食落口就更加不得之了,
啲芝麻味香到呢 ……… 今次個蛋糕唔會太濕,
乾中帶少少濕潤,真係要 "讚好"!


 



Notes:
- 蛋白霜打好之後,可先暫時放入雪櫃保持穩定性,若果變軟的話,可再打至企
  身。


- 如果無他他粉的話,可用 2 茶匙檸檬汁代替。


- 芝麻粒同芝麻粉可互相替代,亦可用同一顏色芝麻粉及芝麻粒。



        你哋亦都可以喺
Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans


屋企好大風呀!!

        夏天我屋企勁熱就係人都知,因為西斜呀嘛!究竟熱到點呢:

- 夜晚十一、二點摸吓幅牆都仲暖嘅。

- Winnie 喺我屋企整曲奇時嗌哂救命,因為個麵糰拎出嚟無幾耐已經熱到瀉哂,根本
  成唔到形。


- 諗住拎嚿牛油出嚟放軟,點知都唔駛一個鐘就已經幾乎溶咁滯!

- 擺喺櫃入面嘅乾貨成日都變壞、"吽" 蟲,試過好耐之前媽咪發現啲杭菊溶哂,變
  液體!


        係咪好驚呢!!不過話時話,好多時又會勁大風喎,好鬼死涼,連 Lily 星期六嚟上堂時都話,我呢度大風到可以玩 wind surf。唔知係咪因為香港夏天多數吹西南風呢?有幾大風?睇吓下面呢幅四格漫畫就知喇:


咗兩件衫喺客廳,可以不停吹到咁樣!




 



喺客廳窗邊影開相見出邊天朗氣清、風和日麗,醒張窗外靚景相
同大家分享啦!我屋企係望住賽馬會個騎術學校,前面係
射箭場,草地上一個個用藍色套套住果啲係
箭靶嚟!個景係咪靚到可以
要嚟做 puzzle 呢!













 

2010年6月20日星期日

環保洗衣球

        早前打開張報紙,幾乎日日都有「SOGO」做特價嘅廣告,不過我都無理到,因為諗住都唔會幫襯 o架啦!一來,我啲 "窮家仔" 點會捨得喺呢度洗錢呀;二來,個地點真係鞭長莫及,我啲住喺 "偏遠墮角" 地區( 唔係自己都嫌遠呀,係「有線」個《樓盤傳真》成日都用呢個 term 嚟形容新界樓咋 ),都唔會咁神心走到咁遠 shopping 啦,你估真係唔駛錢咩!


        但估都估唔到,原來自己到最後都有幫襯到喎,哈哈!不過就唔駛我親身出去 shopping,因為學生 Michelle 有日打電話俾我,話佢媽咪問我係咪真係買洗衣球,佢話SOGO」減到好平,原本賣開四百幾蚊減到 $268,如果係就幫我買個。雖然我唔知道呢個價係咪真係好抵買,但係呢個係個家長嘅一番心事,我梗會領情啦!咪就係喺咁嘅情況下幫襯SOGO」囉!



        其實我都知我自己後知後覺 o架喇,個洗衣球已經出咗好耐,但係我對佢嘅功能真係半信半疑,都唔知係咪真係洗得乾淨。但係 "先頭部隊" Winnie 用過話好好用,Michelle 又話真係洗到啲衫好乾淨,又唔駛落洗衣粉同柔順劑,而且亦因為唔駛洗清殘餘洗衣粉,所以洗一轉就已經可以脫水,真係連水費都慳埋。加上我早前都上過網睇過啲相關資料,覺得都幾 "可信",於是就決定買嚟用喇!


        個包裝盒寫住,洗衣球可用 1000 次,如果每日洗衫一次,可用足 3 年。咁講法,我平均每兩星期先開機 3 次,計落我咪可以用超過 10 年!? 嘩,抵呀!!!!


2010年6月19日星期六

蘿蔔炆腩肉

        上次整完叉燒之後,剩咗好多醃料醬汁,如果就咁倒咗去,覺得好嘥,所以我就用樽裝起佢,放上冰格存儲。今日就拎番樽醃料出嚟解凍,用嚟炆蘿蔔腩肉,效果都唔錯呀!



材料:
五花腩
白蘿蔔
乾蔥頭
薑片


調味料:
叉燒醃料醬汁

紹酒
麻油


- 五花腩洗乾淨,之後汆水、過冷河,切厚件備用。


- 蘿蔔刨皮後沖洗,滾刀切件;乾蔥頭去衣、沖洗,開邊。


- 燒熱油,先爆香薑片同乾蔥頭,然後加入蘿蔔一齊爆炒,灒酒。


- 倒入醃料醬汁、糖及適量水,加埋腩肉,用中慢火炆煮。


- 當蘿蔔及腩肉都炆腍之後,就可以熄火,灑上麻油,盛起上碟。



你知嘛,其實最好味係個汁囉!因為有部份乾蔥頭溶咗落啲汁到,
攪到啲汁又濃又甜呀!



Notes
- 五花腩記得原件汆水,之後先至切件,若果切件後先汆水的話,豬肉就會收縮到
  好細件。


- 由於乾蔥頭煮得耐係會煮溶,所以毋須切片或剁成蓉,可原粒炆煮。


- 若蘿蔔與腩肉都煮好,但仍有少量醬汁剩低的話,可用大火煮至收汁。



        你哋亦都可以喺
Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans 啦!

開心果杏甫意大利杏仁餅乾 Amaretti con Pistacchio e Albicocca

        上次整完個雪地黑森林蛋糕之後,剩咗勁多蛋白,雖然當時無數住用剩幾多,但起碼最少都有 6 隻以上,依家雪喺冰格度,但係都要盡快食咗佢,費時遲咗就仲嘥!咁今日就用咗兩隻蛋白再整多次 Amaretti。



        之前毛豆同我講,話佢見過有意大利廚師會加入果仁,聽落又好似真係幾吸引喎!咁所以今次我就試吓加開心果同杏甫一齊整,一來口感同味道都可以豐富啲,二來顏色都會靚啲,唔駛淨係齋白色咁單調。



咗入爐焗之後就掛住洗嘢,唔記得睇火,攪到焗過龍!不過顏色反而
比上次仲靚啲,口感亦無咁濕同韌,呢次真係塞翁失馬!




 


        今次唔打食譜喇,因為無論材料同做法都同上次一樣,只係喺混合材料時加多咗切碎開心果同杏甫乾,想試吓整嘅朋友就睇番【意大利杏仁餅乾 Amaretti啦。



Notes
- Amaretti con Pistacchio e Albicocca = Amaretti with Pistachio and Apricot。


- 開心果用之前先放入已預熱至 180 °C 嘅焗爐內焗約 8 - 10 分鐘至香。


- 除開心果同杏甫乾之外,亦可以加任何自己喜愛嘅果仁同乾果。



        你哋亦都可以喺 Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans 啦!