2013年5月20日星期一

泰式酸辣雜菜湯

        前排睇番啲食譜剪報時,睇到 Bonnie Yves 好耐之前嘅食譜,佢呢次唔係教整果醬,而係教大家煮個泰式湯水,見佢個味道酸酸辣辣,應該會幾醒胃,而且我又未用過阿參呢樣食材,所以都幾有興趣一試。參考Bonnie 個基本做法,再加上自己 idea 同選料,好容易就煮到喇!

        之前睇到肥媽個電視節目話喺灣仔街市有檔專賣泰國食材,對我嚟講真係一個天大喜訊,因為我每個禮拜都可以經過灣仔,咁就唔使去到九龍城都可以買到啦!檔口所賣嘅嘢都算好齊,價錢平唔平我就真係唔太清楚喇,但起碼都叫做有個地方俾我去買囉,你知啦,啲新鮮東南亞食材及香料真係唔係到處都有得賣,淨係金不換同紅辣椒都好難搵,如果吓吓都話要去到九龍城買的話,我呢個屯門人打埋車費上去,都幾重皮囉!



 
材料:
甘筍
四季豆
泰國青圓茄
番茄
香茅        2
南薑        1 小塊
辣椒乾    適量
乾蔥頭     2
阿參醬    1 湯匙
清雞湯    300 毫升
清水        300 毫升
 
- 甘筍刨皮後切細件;四季豆洗淨後摘去兩邊粗纖維,然後切段。

- 青圓茄同番茄洗乾淨、去蒂,切件;香茅撕去最外層,之後用刀拍鬆、切段。

- 南薑去皮後切片;辣椒乾洗淨、切細;乾蔥頭去衣、切片;阿參醬加小量熱水,用叉
  鬆開拌勻。

-
將清雞湯及水倒入煲內,加入甘筍、香茅、南薑同辣椒乾,煲滾後轉中慢火煮至甘筍
  半腍。

-
之後加入乾蔥片,煲 2 分鐘,將其餘蔬菜料加入煮熟。

- 最後將阿參醬加入,攪拌均勻後落鹽調味。
 

喺灣仔街市嗰個檔口買咗袋勁大粒嘅乾蔥頭,
粒粒都有成個蒜頭咁大,我返到屋企先諗,
呢包會唔會係迷你紫洋蔥呢!

 

 

 




阿參其實係一種果實,又叫做酸子,亦即係用
嚟整喼汁嘅羅望子,味道都幾酸!






味道唔錯喎,飲完之後真係會好開胃,唔怕無胃口食嘢呀!









一個人食飯,簡簡單單就已經有湯又有餸喇!




Notes
-
蔬菜用料可因應自己喜好選擇。
 
- 因阿參醬比較酸,所以最好試過味後再決定用量。

4 則留言:

  1. 整碗嘆吓先喇喂...
    [版主回覆05/21/2013 15:57:52]呢碗直情啱哂妳呀,妳自己煮要加辣㖭啦!

    回覆刪除
  2. 個湯望落清清地又酸酸辣辣都應該幾醒胃
    搵日都去灣仔入貨整餐泰國菜先^^
    [版主回覆05/26/2013 23:55:01]係㗎,飲完之後即刻好開胃呀!

    回覆刪除
  3. 一啲油都冇嘅清湯,我鍾意呀,咁多蔬菜,連飯都唔駛食囉
    [版主回覆05/26/2013 23:58:05]我都鍾意整無油食品,健康之餘,食完之後清洗都快捷方便!
    唔食飯或主糧又唔得,個胃會覺得好虛空哦!

    回覆刪除
  4. 緊張大師-小女人2013年5月24日 上午10:53

    可能我舅母係泰國人以前去探婆婆同舅父時食過舅母的手藝,她在坤勁府開店鋪做生意,好多人駕車來吃來買的,真係好好食,所以在香港食唔番那味道和感覺了.
    [版主回覆06/02/2013 23:15:53]明白!
    [緊張大師-小女人回覆06/02/2013 21:37:35]無呀,我以前無未嫁不用做家務更不用煮飯啦,但現在她們都過生啦,所以我們沒有再去泰國了,因為同表弟他們溝通唔到.
    [版主回覆05/26/2013 23:59:53]嘩,咁妳真係好有福氣哦,可以食到正宗地道嘅泰菜!
    咁妳當時有冇向妳舅母偷師呀?

    回覆刪除